Mar 11 | ASO | STEP | Zelusalemi numuno di avito' igi Oliva golola ebe' seta' Betehagesi Betanisi minasida nene vi hetelani'. Vi hetelisa Izesu' aza izipahala zuhouti' seta' ma ngimiselo

Mark 11

Izesu' Aza Zelusalemi Numungu' Dizo Volosa Navo Evene' Nete Ganine Hizi nGolize Izi Ele'mizi Dizi Vani'

(Mataio' 21:1-11; Luka' 19:28-40; Zohane' 12:12-19)

1 Zelusalemi numuno di avito' igi Oliva golola ebe' seta' Betehagesi Betanisi minasida nene vi hetelani'. Vi hetelisa Izesu' aza izipahala zuhouti' seta' ma ngimiselo 2 ti' lo lo-ngidine': A'mine ningi nizasine' numuno ebeku' volene vi nidizi ningilisine' nene dongi ize evenelite a'mido' mito' mini olihe monamani' nene nalava izi nizavo ningilisasize. A'mine nene vakesi daalizo. 3 Ne'mine nasivo ve mali'mo nanitekumu' nasive lo nolivo ma lingine ti' li li-imilizo: Guvelesi ve aza gono've ma neivo a'mine dongi izemu' mene lavo nousinako gono davo lite' lo gohi do ti'no imiseleleseive li lilizo. 4 Lavo vi numuno gatedo' aka gahevela na'nava izikani' dongi ize angale naba nene ningi vakesasine'. 5 Ne'mine igi nizasivo a'mido' minave nete longo' i-ngidi ti' li lani': Ize nene nanitekumu' nivakesasive. 6 Likevo Izesu' lo-ngimine' gamazi ma nene li-ngimikesivo ha huli-ngimikavo vasine'. 7 Huli-ngimikavo vi a'mine dongi ize nene Izesuda di ikesivo saketi'ine nene apasi ize ne'mi mehenelo' milikevo Izesu' aza a'mido' dizo minine'. 8 Ne'mine ogavo Evene' linge muki' nete nene saketi'ine apasi akalo' avilise' i'mi nivavo linge ma nete nene za a'nava avilesi guviseti' huki di ani' nene avilise' i'mi vani'. 9 Ne'mine i'mi nivavo gomu' milavesi alinge' milavesi ingine geke' geke' li ti' li lani': Geikumu' nene gopo'ni nolunize. Guvetesi ve o'moso'mi velemu' anive gei' nene O'moso'mo no'noho' ize-gidivo. 10 Avoteho Davidi' mo'mosi've do geita ogo guvetesi ve lolo' ogo gizebo o-ledo mineline' gamene nene alitaze. A'mine gizebo iline' nene O'moso'mo no'noho' izelive. Agae, veleta Okulumoku' O'moso gei' nene gopo'ni nolune.

11 Ne'mine i'mi navo Izesu' aza Zelusalemi numuno ebeku' dizosa mono' numuno nabau' dizo inite' mata' mono ninge osu' line'. Ne'mine ine' nene nivenga' mo molangu' nenako azasi izipahala zuho tuvelu nesi nene Betani numuda limi vani'.

Gohuno Za Ma Izesu' Usi' Ize-dine' Gamazi

(Mataio' 21:18-19)

12 Liti'muso izo go' lavo Betani numudati' nilimi Izesu' ga'na olavo 13 gohuno za avile mukikisi hoto' neivo ningo a'mido' gihile ize neihe lo vise' olosa vine'. Vo ningo gihile izaa' gamene amine' nenako gihile izamivo avilevo' ningine'. 14 Ningo a'mine zamu' ti' lo line': Geito' nene gihile gohi ma izamivo ve mali'mosi elo namilive. Ne'mine line' nene izipahala zuho nete gilani' ve.

Izesu' Aza Mono' Numuno Nabau' Maketi Milaa' Meni Hizaa' Igi Minave Nene nGimiselo Do Huline'

(Mataio' 21:12-17; Luka' 19:45-48; Zohane' 2:13-22)

15 Ido' Zelusalemi numuda gohi vi hetelani'. A'mida Izesu' aza mono' numuno nabau' vo dizo inite' maketi milaa' meni hizaa' igi minave nene ngeleto do hulo mono' numungu' hulaa' moni senisimi iga' aveliti holomo'ine nene do tululu lo do hulo-ngedo nama viluso O'moso lehizi-dilizangumu' meni hizilizave li maketi mili minavete minaa' holomo'inesi nene do velepe' izo hite-ngidine'. 16 Ido' mono' numuno nabau' nene maketi inite' nevo'mine nene di dizi limi amilizave lo o've lo-ngidine'. 17 Ne'mine lo-ngedo evene' apize ngemo ti' lo line': O'moso'mo ti' lo line' gamazi ma nene luhuvo gizamani' nehe:

Neni' numu'ne nene
evene' ato ato' zuho muki' nete dizi nopo'ni li-nimaa' numuno ve losa mineleseive.
Ne'mine li gizani'za lingine a'mingu' igi mili minaa' nani' inite' ne'mo nene guminelo' vete igi mili minaa' numuno lolo' ogave.

18 Ne'mine lavo eveneto' medeli mini O'moso inite' lehizi-daa' ave nabasi mono' apizi ngimaa' avesi ingine gili bililizani' aka vise' i'mi vi minani'. Ido' bililizani' akamu' vise' ani' nene nanitekumu' ve. Evene' muki' nete eze apize ngemo minine' gamazi nemu' nene lanite' gili golize lani' nenako nemu' ingine golise gili bililizani' akamu' nene vise' i'mi vi minani' ve.

19 Ido' mo nivenga' molavo izipahala zuhosi Zelusalemi numuno ebe' nene huli vani' ve.

Gele Ele'vole' O Mino O'mosola Lakumu' Izesu' Line' Gamazi

(Mataio' 21:20-22)

20 Ingi go' lavo nedenga' akalo' gohi nivi gohuno za nene monovoukoti' gulugulu ize piline' nene ningani'. 21 Petolo' aza a'mine za ningidoti' Izesu' gamazi line' ma nene galau' ogavo gohi gelo ti' lo lo-imine': Tisazo, ningezo. Gei' usi' ize-daine' gohuno za nene mo gulugulu izave. 22 Lavo Izesu' do velepe' izo ti' lo lo-ngimine': Lingine nene O'mosomu' gili ele'vole' igisa minilo. Naza lamineto' ma lo-lengemelove. 23 Ve mali'mo gala seta' gelamo loloni' gamazi nene gihile izeleseive lo gele ele'vole' o mino mene golomu' ngutoko guvo nosou' lemelive lo lo-deline' nene lilido' gihile ha izeleseive. 24 Nemu' nolo-lingimuve. Inite' ne'mine mana'mine initekumu' O'mosola li longo' igi nili mo dalosune li gili ele'vole' ilizani' nene lilizado' ha gihile izeleseive. 25 Ido' gamene gamene oti mini O'moso opo'ni nilii ma ve mamu' lihime di minilizani' nene ha huli-ngidilo. Ne'mine ikevo Okulumoku' metibo aza a'mine'mine ogo lengi' lihimetine nene ha hulo-lengedeleseive.

Izesu' Ogo Molo Oga' Ine' Amuzo'vemu' Longo' I-dani' Gamazi

(Mataio' 21:23-27; Luka' 20:1-8)

27 Ido' Zelusalemi numuda gohi dizi ikevo Izesu' aza mono' numuno nabau' dizo nomonivo eveneto' medeli mini O'moso inite' lehizi-daa' ave nabasi mono' apizi ngimaa' avesi mono' gizebo vesi ezela igi 28 longo' i-di ti' li lani': Inite' oga' naine' nene zahi velemu' oga' nane. Ido' zaho lavosa oga' nane. 29 Longo' i-dikevo aza ti' lo lo-ngimine': Nazasi inite' mamu' longo' o-lengedekuvo li-nimilizani' nene naza zahi velemu' inite' oga' nouhe nemu' nene lo-lengemelesuve. 30 Mono' noso holo-ngedelive lo Zohane'ni imiselive ma nene O'moso'mo imiselihe haza misubou' velite imiselave. Lingine a'minemu' likevo gelelove. 31 Ne'mine lavo ingine angise'inemu' li volelo' melo' igi ti' li lani': Laza O'moso'mo imiselive loso' nene Izesu' aza lingine ti' li ma eito' nene nanimu' gili ele'vole' amave lo lalive. 32 Ne neiha haza misubou' velite imiselave ha lolobe. Ne'mine lani' nene evene' muki' nete Zohane' nene polohete gihile minine' ve li gilani' nenako eveneliti golise'ine gili lani' ve. 33 Nemu' nene Izesu' longo' ine' gamazilo' nene ti' li li-imani': Laza ma gelamune. Likevo Izesu' aza ti' lo lo-ngimine': Lingine li-nimamani' nemu' nene nazasi ogo molo oga' nouvoni' inite' nene iline lo nimiselivemu' nene ma lo-lengamamolosuve.